(၂)နှစ်နီးပါး ရောင်းချနေပေမယ့် ဝယ်သူမရှိလို့ ဈေးလျှော့ရောင်းနေတဲ့ စီရော်နယ်ဒို နေခဲ့တဲ့အိမ်
မန်ချက်စတာမြို့တောင်ဘက် အယ်လ်ဒါလေးအက်ချ်ဒေသက ချက်ရှိုင်းယားမှာရှိတဲ့ စီရော်နယ်ဒိုနေထိုင်ခဲ့တဲ့နေအိမ်ကို အိမ်ခြံမြေဈေးကွက်မှာ ပေါင်(၅)သန်းနဲ့ ဈေးခေါ်ထားပြီး ဝယ်ယူသူမရှိသေးကြောင်းသိရပါတယ်။
ဒီနေအိမ်က မန်ယူနိုက်တက်ကစားသမားဘဝက စီရော်နယ်ဒို နေထိုင်ခဲ့တဲ့ ဇိမ်ခံနေအိမ်ဖြစ်ပြီး အိပ်ခန်း(၇)ခန်း၊ ရေကူးကန်၊ တင်းနစ်ကွင်း၊ အရက်ဘားတွေပါကြောင်း သိရပါတယ်။
ဒီနေအိမ်ကို စီရော်နယ်ဒိုက ပိုင်ဆိုင်ထားဆဲဖြစ်ပြီး ပြီးခဲ့တဲ့ ၂၀၂၃ ခုနှစ် ဖေဖော်ဝါရီလကတည်းက ပေါင်(၅.၅)သန်းနဲ့စျေးခေါ်ရောင်းခဲ့တာပါ။
(၂)နှစ်နီးပါး ပေါင်(၅.၅)သန်းနဲ့ ရောင်းချခဲ့ပေမယ့် ဝယ်မယ့်သူ မပေါ်ထွက်လာတာကြောင့် အခု ပေါင်(၅)သန်းထိ လျှော့ချပေးထားတာပါ။
ဒီနေအိမ်ကို ဝယ်ယူသူအနေနဲ့ (၂၃ )ဧက ကျယ်ဝန်းတဲ့ ခြံဝန်းကျယ်ကြီးကို ပိုင်ဆိုင်မှာဖြစ်တဲ့အပြင် ဒီ ခြံဝန်းကျယ်ထဲမှာ ဆောက်ထားတဲ့ ကြီးမားတဲ့ စပါးကျီလို ဂိုဒေါင်ကြီး (၁)လုံးကိုပါ ရရှိမှာပါ။
ဒီဂိုဒေါင်ကြီးထဲမှာ အိပ်ခန်းတွေဖွဲ့ထားပြီး ဧည့်သည်တွေလာရင် တည်းခိုနိုင်ဖို့ပါ ရည်ရွယ်တည်ဆောက်ထားကြောင်း သိရပါတယ်။
