ကံကံ၏ အကျိုးကို ယုံကြည်တဲ့ အာဆင်နယ်ပရိသတ်
မန်စီးတီး(၂-၂)အာဆင်နယ်ပွဲမှာ ဒဏ်ရာပြင်းပြင်းထန်ထန်ရပြီး တစ်ရာသီလုံးအနားယူရတော့မယ့် စပိန်ကွင်းလယ်လူရိုဒရီနဲ့ ပတ်သက်ပြီး အာဆင်နယ်ပရိသတ်တွေက ကိုယ်လုပ်ခဲ့တဲ့မကောင်းမှုကုသိုလ်ကံက ကိုယ့်ကို ပြန်လာထိခိုက်တာလို့ ဝေဖန်ရေးသားခဲ့ကြပါတယ်။
ရိုဒရီဟာ အာဆင်နယ်ကွင်းလယ်လူ ပါတေးနဲ့ ထိခိုက်မိပြီး ACL လို့ခေါ်တဲ့ ဒူးခေါင်းအတွင်းပိုင်းက အရွတ်စုတ်ပြဲသွားတာပါ။
သူ့ရဲ့ဒဏ်ရာကို စမ်းသပ်မှုတွေပြုလုပ်ခဲ့ရာမှာ အလွန်ပြင်းထန်နေကြောင်းတွေ့ရှိရတဲ့အတွက် ဒီရာသီ မန်စီးတီးအသင်းအတွက် ပြန်ကစားပေးနိုင်တော့မှာ မဟုတ်ဘူးလို့ တာဝန်ရှိသူတွေက မှတ်ချက်ပြုခဲ့ကြပါတယ်။
အာဆင်နယ်ပရိသတ်တချို့က သူတို့ရဲ့အသင်းခေါင်းဆောင်အော်ဒီဂါကို ရိုဒရီက ဒဏ်ရာရအောင် ပြုလုပ်ခဲ့ဖူးတာကို ပြန်လည်ဖော်ထုတ်ခဲ့ကြပြီး ရိုဒရီအနေနဲ့ သူတစ်ပါးကို မကောင်းကြံခဲ့လို့ အခုလို ကိုယ်ပြန်ခံရတာလို့ ဆိုရှယ်မီဒီယာမှာ ရေးသားခဲ့ကြပါတယ်။
ပြီးခဲ့တဲ့ ၂၀၂၃ ခုနှစ်အတွင်းက စပိန်နဲ့ နော်ဝေအသင်းတို့ ကစားခဲ့တဲ့ ယူရို-၂၀၂၄ ခြေစစ်ပွဲမှာ စပိန်ကွင်းလယ်လူရိုဒရီက နော်ဝေကွင်းလယ်လူအော်ဒီဂါကို ကြမ်းကြမ်းတမ်းတမ်းဖျက်ထုတ်ကစားခဲ့လို့ ဒဏ်ရာရရှိခဲ့တာပါ။
အာဆင်နယ်ပရိသတ်တစ်ဦးက “ကျွန်တော်ကတော့ ရိုဒရီကို စာနာသနားစိတ် နည်းနည်းလေးမှ မရှိပါဘူး။ ပြီးခဲ့တဲ့ရာသီက ပရီးမီးယားလိဂ်ချန်ပီယံဆုအတွက် မန်စီးတီးနဲ့ အာဆင်နယ်အပြိုင်အဆိုင်ဖြစ်နေချိန်မှာ နိုင်ငံတကာရက်သတ္တပတ်အတွင်း အော်ဒီဂါကို သူဘာလုပ်ခဲ့သလဲဆိုတာ ုပြန်တွေးကြည့်ကြပါ။ ကိုယ်ပြုခဲ့တဲ့ကံ ကိုယ်ပြန်ခံရတာပါ”လို့ အာဆင်နယ်ပရိသတ်တစ်ဦးက X မှာ ရေးသားခဲ့ပါတယ်။
အာဆင်နယ်ပရိသတ်နောက်တစ်ယောက်ကလည်း ” နိုင်ငံတကာရက်သတ္တပတ်အတွင်းမှာ အော်ဒီဂါရဲ့ကစားသမားဘဝအဆုံးသတ်သွားအောင် ရိုဒရီလုပ်ခဲ့ဖူးပါတယ်။ ပြီးတော့ သူတို့ကပဲ ကျွန်တော်တို့အသင်းကို ညစ်ညစ်ပတ်ပတ်ကစားတယ်ဆိုပြီး စွပ်စွဲသေးတယ်”လို့ ရေးသားခဲ့ပါတယ်။
