ဒီရာသီ တစ်လတာ အကောင်းဆုံးဆု ပထမဆုံး(၃)ခုကို ရယူခဲ့ကြတဲ့ ဘာစီလိုနာ တိုက်စစ်အတွဲ(၃)ဦး
ဒီရာသီလာလီဂါပြိုင်ပွဲမှာ ချီးမြှင့်တဲ့ တစ်လတာအကောင်းဆုံးကစားသမားဆု ပထမဆုံး(၃)ခုကို ဘာစီလိုနာအသင်းရဲ့တိုက်စစ်တွဲဖက်ကစားသမား(၃)ဦးက ဆက်တိုက်ရယူခဲ့ပါတယ်။
ဒီရာသီရဲ့ပထမဆုံးလဖြစ်တဲ့ သြဂုတ်လအတွက်ချီးမြှင့်တဲ့ဆုကို ဘရာဇီးလ်တောင်ပံတိုက်စစ်ကစားသမားရာဖင်ညာက ဆွတ်ခူးခဲ့ပြီး၊ ဒုတိယလဖြစ်တဲ့ စက်တင်ဘာလအတွက်ချီးမြှင့်တဲ့ဆုကို စပိန်လူငယ်တောင်ပံကစားသမားလာမင်းယာမားလ်က ဆွတ်ခူးခဲ့ပါတယ်။
မနေ့က ဒီရာသီတတိယဆုအဖြစ် အောက်တိုဘာလအတွက်ချီးမြှင့်ခဲ့ရာမှာ ပိုလန်တိုက်စစ်မှူးလီဝန်ဒေါစကီးက ဆွတ်ခူးခဲ့ပါတယ်။ လီဝန်ဒေါစကီးဟာ ဒီဆုကို ၂၀၂၂ အောက်တိုဘာလနဲ့ ၂၀၂၄ ဖေဖော်ဝါရီလတွေမှာလည်း ဆွတ်ခူးခဲ့ဖူးတာကြောင့် အခု (၃)ကြိမ်မြောက်အဖြစ် ရရှိခဲ့တာဖြစ်ပါတယ်။
လီဝန်ဒေါစကီးအနေနဲ့ ရီးရဲလ်မက်ဒရစ်ကစားသမားဟောင်း စီရော်နယ်ဒို ရခဲ့ဖူးတဲ့အကောင်းဆုံးကစားသမားဆုအရေအတွက် (၃ ကြိမ်)နဲ့ မှတ်တမ်းတူခဲ့ပြီး ဒီဆုရရှိမှုမှာ သူ့ထက် အရေအတွက်ပိုများသူဆိုလို့ (၅)ဦးသာ ကျန်ပါတော့တယ်။
၂၀၁၃-၁၄ ရာသီက စတင်ချီးမြှင့်တဲ့ဒီဆုကို လက်ရှိအက်သလက်တီကိုမက်ဒရစ်တိုက်စစ်မှူးဂရီးဇ်မန်းနဲ့ မက်ဆီတို့က အများဆုံးအဖြစ် (၈)ကြိမ်စီ ဆွတ်ခူးထားကြပါတယ်။ သူတို့နှစ်ဦးနောက်မှာ ဘန်ဇီမာ(၅)ကြိမ်၊ အက်စ်ပတ်(၄ ကြိမ်)၊ ဆွာရက်ဇ်(၄ ကြိမ်)၊ လီဝန်ဒေါစကီး(၃ ကြိမ်)တို့ရှိနေပါတယ်။
လက်ရှိလာလီဂါမှာ ဂရီးဇ်မန်း၊ အက်စ်ပတ်နဲ့ လီဝန်ဒေါစကီးတို့က ဆက်လက်ကစားနေကြဆဲဖြစ်တာကြောင့် ဒီကစားသမားတွေအနေနဲ့ ဒီဆုကို ဘယ်လောက်အထိ ဆက်လက်ရယူနိုင်ဦးမလဲ ကြည့်ရမှာပါ။
