မိမိတို့ရဲ့ပထမဆုံးရည်မှန်းချက် ပြီးမြောက်ခဲ့ပြီလို့ Supporters’ Shield ရယူပြီးနောက် မက်ဆီဆို
အင်တာမိုင်ယာမီအသင်းဟာ ၂၀၂၄ မေဂျာလိဂ်ရာသီအတွက် Supporters’ Shield ဆုဖလားကို ကိုင်မြှောက်နိုင်ခဲ့ပြီးနောက် အသင်းခေါင်းဆောင် မက်ဆီက ဒါဟာ သူတို့အတွက် ပထမဆုံးရည်မှန်းချက်ပြီးမြောက်ခဲ့ပြီလို့ သူ့ရဲ့ဆိုရှယ်မီဒီယာမှာရေးသားခဲ့ပါတယ်။ အင်တာမိုင်ယာမီအသင်းဟာ Supporters’ Shield ကို ကလပ်အသင်းသမိုင်းတစ်လျှောက် ပထမဆုံးအကြိမ်ရယူနိုင်ခဲ့တာပါ။
အင်တာမိုင်ယာမီအသင်းဟာ ကိုလံဘက်စ်ခရူအသင်းကို (၃-၂)ဂိုးနဲ့ အနိုင်ရခဲ့ပြီးနောက် မေဂျာလိဂ်ရာသီမပြီးဆုံးခင်မှာ Supporters’ Shield ကိုရယူနိုင်ခဲ့တာဖြစ်ပါတယ်။ ဒီပွဲမှာ အင်တာမိုင်ယာမီအသင်းအတွက်ဂိုးတွေကို မက်ဆီက(၂)ဂိုးနဲ့ ဆွာရက်ဇ်က (၁)ဂိုးသွင်းယူခဲ့တာပါ။ ဒီဆုဖလားဟာ မက်ဆီရဲ့ကစားသမားဘဝမှာ စံချိန်တင်(၄၆)ခုမြောက်ဆုဖလားဖြစ်သလို အင်တာမိုင်ယာမီအသင်းအတွက် ဒုတိယမြောက်ဆုဖလားဖြစ်ခဲ့ပါတယ်။
မက်ဆီဟာ ပြီးခဲ့တဲ့ရာသီက အင်တာမိုင်ယာမီအသင်းကို ကလပ်သမိုင်းတစ်လျှောက် ပထမဆုံးဆုဖလားဖြစ်တဲ့ လိဂ်ဖလားရရှိအောင် ဦးဆောင်ပေးနိုင်ခဲ့တာပါ။ Supporters’ Shield ကိုရယူပြီးနောက်မှာ မက်ဆီက “ပထမရည်မှန်းချက်က ပြီးမြောက်ခဲ့ပါပြီ။ ဒီအဖွဲ့အတွက်အလွန်ဂုဏ်ယူပြီး နောက်ထပ်အောင်မြင်မှုတွေကို အတူတူရယူချင်တဲ့ စိတ်ဆန္ဒတွေနဲ့ ကျွန်တော်တို့ရှေ့ဆက်ကြမယ်”လို့ Instagram မှာ ရေးသားခဲ့ပါတယ်။
အင်တာမိုင်ယာမီအသင်းဟာ မေဂျာလိဂ်ဖလား playoff ပြိုင်ပွဲကိုလည်း ဝင်ရောက်ယှဉ်ပြိုင်ခွင့်ရရှိထားတဲ့အတွက် မက်ဆီက ဒီဆုဖလားကိုပါ ရယူကာ ၂၀၂၄ ရာသီကို အောင်မြင်စွာအဆုံးသတ်နိုင်ဖို့ ပစ်မှတ်ထားနေတာ ဖြစ်ပါတယ်။
