ပြင်းထန်တဲ့ ဒူးဒဏ်ရာကြောင့် ရီးရဲလ်နောက်ခံလူ ကာဗာဟယ်လ် ငိုကြွေးပြီး ကွင်းထဲကနေ ထွက်ခွာ
မနေ့က ရီးရဲလ်မက်ဒရစ်(၂-ဝ)ဗီလာရီးရဲလ် လာလီဂါပွဲစဉ်မှာ ရီးရဲလ်မက်ဒရစ်အသင်းနောက်ခံလူ ကာဗာဟယ်လ်ဟာ ပြင်းထန်တဲ့ဒူးဒဏ်ရာရရှိခဲ့တာကြောင့် ငိုကြွေးပြီး ကွင်းထဲကနေ ထွက်ခွာခဲ့ပါတယ်။ ဒီပွဲစဉ်ရဲ့ဒုတိယပိုင်းပြီးခါနီးမှာ ကာဗာဟယ်လ်ဟာ ဗီလာရီးရဲလ်အသင်းကစားသမား ပီနိုဆီကနေ ဘောလုံးကို ရှင်းထုတ်ဖို့ကြိုးစားခဲ့ပေမယ့် သူ့ရဲ့ညာခြေထောက်ဟာ ပီနိုရဲ့ခြေထောက်ကြားထဲကို ရောက်ရှိသွားပြီး ပြင်းထန်တဲ့ ဒူးဒဏ်ရာကို ရရှိသွားခဲ့တာပါ။
ကာဗာဟယ်လ်ဟာ ချက်ချင်းကွင်းထဲကို လဲကျသွားခဲ့ပြီး နာကျင်မှုဒဏ်ကို မခံနိုင်တာကြောင့် ငိုကြွေးနေခဲ့တာဖြစ်ပါတယ်။ ရီးရဲလ်မက်ဒရစ်အသင်းဖော်တွေကို ကာဗာဟယ်လ်ဆီကို အမြန်ဆုံးပြေးလာခဲ့သလို ကွင်းလယ်ဒိုင်လူကြီးကလည်း ဆေးအဖွဲ့ကို ကွင်းထဲအမြန်ဆုံးဝင်ရောက်ဖို့ ခေါ်ယူခဲ့တာပါ။ ကာဗာဟယ်လ်ဟာ ဆေးကုသမှုခံယူအပြီးမှာ ထမ်းစင်နဲ့ ကွင်းပြင်ကို ခေါ်ဆောင်ခြင်းခံခဲ့ရပြီး ငိုကြွေးနေခဲ့တာဖြစ်ပါတယ်။
ရီးရဲလ်မက်ဒရစ်နဲ့ ဗီလာရီးရဲလ်အသင်းကစားသမားတွေဟာ ကာဗာဟယ်လ်ရဲ့ဒဏ်ရာအခြေအနေအပေါ် အလွန်စိုးရိမ်နေခဲ့ကြတာပါ။ ရီးရဲလ်မက်ဒရစ်အသင်းနည်းပြ အန်ဆယ်လော့တီက ကာဗာဟယ်လ်ရဲ့ဒဏ်ရာဟာ အလွန်ပြင်းထန်ပုံရပြီး အဝတ်လဲခန်းအတွင်းမှာ ဝမ်းနည်းမှုတွေနဲ့ စိုးရိမ်မှုတွေဖြစ်ခဲ့တယ်လို့ ပွဲအပြီးမီဒီယာတွေ့ဆုံမှုမှာ ဆိုခဲ့ပါတယ်။
ကာဗာဟယ်လ်က သူဟာ ပြင်းထန်တဲ့အရွတ်ဒဏ်ရာရရှိခဲ့တဲ့အတွက် ခွဲစိတ်မှုခံယူရမှာဖြစ်ပြီး လပေါင်းများစွာအနားယူရမယ်လို့ သူ့ရဲ့Instagram မှာ ရေးသားထားပါတယ်။ ရီးရဲလ်မက်ဒရစ်အသင်းအတွက်တော့ အဓိက ကစားသမားတစ်ဦးကို လပေါင်းများစွာကြာအနားပေးရတော့မှာဖြစ်လို့ ကြီးမားတဲ့ ထိုးနှက်ချက်ဖြစ်ခဲ့ပါတယ်။ ရီးရဲလ်မက်ဒရစ်အသင်းဟာ ကာဗာဟယ်လ်ရဲ့ဒဏ်ရာကြောင့် ဇန်နဝါရီအပြောင်းအရွှေ့ကာလမှာ ညာနောက်ခံလူခေါ်ယူဖွယ်ရှိနိုင်ပေမယ့် နည်းပြ အန်ဆယ်လော့တီက သူတို့မှာ လူးကပ်စ်ဗတ်စ်ကွက်ဇ်ရှိတယ်လို့ ပြောခဲ့တာဖြစ်ပါတယ်။
