PSG နဲ့ ယူရို(၅၅)သန်း ပေးချေမှုအငြင်းပွားမှုမှာ ကြားဝင်ဖျန်ဖြေပေးမှုကို ဘာပေ ငြင်းပယ်

ပြင်သစ်အသင်းခေါင်းဆောင် ဘာပေဟာ လစာ၊အပိုဆုကြေးတွေနဲ့ ပတ်သက်ပြီး အသင်းဟောင်း PSG အသင်းကနေ ရရှိမယ့် ယူရို(၅၅)သန်းအငြင်းပွားမှုအပေါ် ပြင်သစ်ဘောလုံးလိဂ်တရားရေးကော်မရှင်ရဲ့ကြားဝင်ဖျန်ဖြေမှုပြုလုပ်ဖို့ ကမ်းလှမ်းမှုကို ငြင်းပယ်ခဲ့ပါတယ်။ ဘာပေဟာ ဒီအဖြစ်အပျက်မှာ ကော်မရှင်ကို ပါဝင်ပေးဖို့တောင်းဆိုခဲ့ပြီးနောက် သူ့ရဲ့ကိုယ်စားလှယ်အဖွဲ့တွေဟာ PSG အသင်းတာဝန်ရှိသူတွေနဲ့ ပါရီမှာ တွေ့ဆုံခဲ့ကြပါတယ်။

ဒါပေမယ့် ဘာပေရဲ့ကိုယ်စားလှယ်အဖွဲ့တွေဟာ ဒီအစည်းအဝေးအတွင်းမှာ ဖြစ်နိုင်ဖွယ်ရှိတဲ့အရာကို ပယ်ချခဲ့ပြီး ဖျန်ဖြေခြင်းဟာ အသုံးမဝင်ခဲ့ဘူးလို့ AP သတင်းမှာ ဖော်ပြထားပါတယ်။ PSG အသင်းကတော့ ဗုဒ္ဓဟူးနေ့က ကော်မရှင်မှာ (၂)နာရီကြားနာခဲ့တဲ့အပေါ်ကျေနပ်မိတယ်လို့ထုတ်ပြန်ထားပါတယ်။ ဘာပေဟာ ပြီးခဲ့တဲ့ရာသီမစတင်ခင်မှာ သူဟာ နောက်ထပ်တစ်နှစ်သက်တမ်းတိုးခွင့်ကို မရွေးချယ်တော့ဘူးလို့ PSG အသင်းကို အကြောင်းကြားခဲ့တာကစတင်ပြီး တင်းမာမှုတွေစတင်ခဲ့တာပါ။

PSG အသင်းဟာ ဘာပေကို ရာသီကြိုခြေစမ်းပွဲယှဉ်ပြိုင်မယ့် ဂျပန်နဲ့ တောင်ကိုရီးယားနိုင်ငံကို ထွက်ခွာခဲ့တဲ့ လူစာရင်းမှာ ချန်လှပ်ခဲ့သလို အလွတ်နဲ့မဆုံးရှုံးချင်တာကြောင့် ဆော်ဒီပရိုလိဂ်ကလပ် အယ်လ်ဟီလယ်အသင်းထံ ရောင်းချဖို့ လုပ်ဆောင်ခဲ့ပါတယ်။ ဒါပေမယ့် ဘာပေဟာ အယ်လ်ဟီလယ်အသင်းရဲ့ယူရိုသန်း(၃၀၀)နဲ့ ကမ်းလှမ်းမှုကို ငြင်းပယ်ခဲ့တာပါ။ PSG အသင်းဟာ ဘာပေကို ပြင်သစ်လီဂူး-၁ အဖွင့်ပွဲစဉ်မှာ ချန်လှပ်ခဲ့ပေမယ့် နောက်ပိုင်းမှာ ဆွေးနွေးမှုပြုလုပ်ပြီးနောက် လူစာရင်းထဲ ပြန်ပါဝင်ဖို့ ခွင့်ပြုခဲ့တာဖြစ်ပါတယ်။

ဒီနောက်ပိုင်းမှာလည်း PSG အသင်းဟာ ဘာပေကို စာချုပ်သက်တမ်းတိုးနိုင်ဖို့ ကြိုးပမ်းခဲ့ပေမယ့် အဆင်မပြေခဲ့ပါဘူး။ ဘာပေဟာ PSG အသင်းနဲ့ စာချုပ်ကုန်ဆုံးပြီးနောက် ဒီနွေရာသီအပြောင်းအရွှေ့ကာလမှာ ရီးရဲလ်မက်ဒရစ်အသင်းထံ အလွတ်နဲ့ ပြောင်းရွှေ့ခဲ့တာဖြစ်ပါတယ်။