ဖိုဒန်ကို လုပ်ခလစာအများဆုံး ဗြိတိန်ကစားသမားဖြစ်လာမယ့် စာချုပ်သစ်ကမ်းလှမ်းဖို့ မန်စီးတီး စီစဉ်

မန်စီးတီးအသင်းဟာ အကယ်ဒမီထွက် ဖိုဒန်ကို လုပ်ခလစာအများဆုံးရရှိတဲ့ ဗြိတိန်ကစားသမားဖြစ်လာမယ့် စာချုပ်သစ်ကမ်းလှမ်းဖို့ ပြင်ဆင်နေပါတယ်။

စာချုပ်အသစ်အရ အင်္ဂလန်ကွင်းလယ်ကစားသမား ဖိုဒန်ဟာ မန်စီးတီးအသင်းမှာ တစ်ပတ်လုပ်ခပေါင်(၃၇၅,၀၀၀)ရရှိမယ်လို့ သိရပါတယ်။

ဖိုဒန်ဟာ ပြီးခဲ့တဲ့ရာသီက မန်စီးတီးအသင်း ပရီးမီးယားလိဂ်ဖလားကို စံချိန်တင်(၄)ကြိမ်ဆက်တိုက်ရယူနိုင်ခဲ့ရာမှာ အဓိကအရေးပါတဲ့သူဖြစ်ပြီး သူဟာ လိဂ်ပြိုင်ပွဲမှာ (၁၉)ဂိုးအထိ သွင်းယူနိုင်ခဲ့တာဖြစ်ပါတယ်။ အဲ့ဒါကြောင့် ဖိုဒန်ဟာ ပြီးခဲ့တဲ့ရာသီ ပရီးမီးယားလိဂ်အကောင်းဆုံးကစားသမားဆု၊အားကစားကလောင်ရှင်များအဖွဲ့ချုပ်ကပေးတဲ့ အကောင်းဆုံးကစားသမားဆုတွေကို ရယူနိုင်ခဲ့တာပါ။ ဖိုဒန်ဟာ ၂၀၂၂ က အပိုဆုကြေးအပါအဝင် တစ်ပတ်လုပ်ခပေါင်(၂)သိန်းကျော်နဲ့ မန်စီးတီးအသင်းမှာ ၂၀၂၇ ဇွန်အထိရှိမယ့် စာချုပ်ချုပ်ဆိုခဲ့တာဖြစ်ပါတယ်။

အခုအချိန်မှာ ဥရောပထိပ်သီးကလပ်အချို့က ဖိုဒန်ကိုခေါ်ယူဖို့ စိတ်ဝင်စားနေတာကြောင့် မန်စီးတီးအသင်းဟာ လုပ်ခလစာအများကြီးတိုးပေးပြီး စာချုပ်သစ်ကမ်းလှမ်းဖို့ ပြင်ဆင်နေတာပါ။ မန်စီးတီးအသင်းဟာ ဖိုဒန်ကို အသက်(၃၀)နှစ်ပြည့်မယ့် ၂၀၃၀ အထိစာချုပ်ချုပ်ကာ ဗြိတိန်ကစားသမားတွေထဲမှာ လုပ်လစာအများဆုံးရရှိတဲ့ ကစားသမားဖြစ်လာအောင် လုပ်ဆောင်ပေးဖို့ရှိနေတာဖြစ်ပါတယ်။

ဖိုဒန်ဟာ လက်ရှိအချိန်မှာ ယူရို-၂၀၂၄ ပြိုင်ပွဲဝင်မယ့် အင်္ဂလန်အသင်းနဲ့အတူ ပူးပေါင်းပြီး ပြင်ဆင်နေတာကြောင့် မန်စီးတီးအသင်းဟာ ပြိုင်ပွဲအပြီးမှ ဖိုဒန်ကို စာချုပ်သစ်ကမ်းလှမ်းသွားဖို့ ရှိနေတာပါ။ ၂၀၁၇ ကတည်းက မန်စီးတီးအသင်းအတွက် ပွဲထွက်ခွင့်ရခဲ့တဲ့ ဖိုဒန်ဟာ ပွဲပေါင်း(၂၇၀)ပွဲကစားထားပြီး (၈၇)ဂိုးသွင်းယူကာ ပရီးမီးယားလိဂ်ဖလား(၆)ကြိမ်၊ချန်ပီယံလိဂ်ဖလား(၁)ကြိမ်အပါအဝင် ဆုဖလားအများအပြားရယူနိုင်ခဲ့တာဖြစ်ါပါတယ်။