ယူရို-၂၀၂၄ ပြိုင်ပွဲအပြီးမှာ ဘာပေ နှာခေါင်းခွဲစိတ်မှုခံယူရမယ်လို့ ဒေးရွှမ့်စ် အတည်ပြု
ပြင်သစ်အသင်းနည်းပြ ဒေးရွှမ့်စ်က အသင်းခေါင်းဆောင် ဘာပေဟာ ကျင်းပနေတဲ့ ယူရို-၂၀၂၄ ပြိုင်ပွဲအပြီးမှာ နှာခေါင်းခွဲစိတ်မှုခံယူရမယ်လို့ ပြင်သစ်ဘောလုံးအဖွဲ့ချုပ်တရားဝင်မီဒီယာနဲ့တွေ့ဆုံချိန်မှာ အတည်ပြုပြောခဲ့ပါတယ်။
ပြင်သစ်အသင်းက သြစတြီးယားအသင်းကို (၁-ဝ)ဂိုးနဲ့ အနိုင်ရခဲ့တဲ့ ယူရို-၂၀၂၄ ပြိုင်ပွဲအုပ်စုအဖွင့်ပွဲစဉ်မှာ အသင်းခေါင်းဆောင် ဘာပေဟာ ပြိုင်ဘက်နောက်ခံလူရဲ့ပခုံးနဲ့ မျက်နှာထိခိုက်မိပြီး နှာခေါင်းရိုးကျိုးသွားခဲ့တာပါ။
အဲ့ဒါကြောင့် ဘာပေဟာ နှာခေါင်းကို ခွဲစိတ်ကုသမှုခံယူရလိမ့်မယ်လို့ သတင်းတွေထွက်ခဲ့ပေမယ့် ပြင်သစ်ဘောလုံးအဖွဲ့ချုပ်(FFF)က လောလောဆယ် ခွဲစိတ်ကုသမှုခံယူဖို့ မလိုအပ်ဘူးလို့ အတည်ပြုခဲ့ပါတယ်။ ဘာပေအနေနဲ့ လာမယ့် ပြင်သစ်အသင်းရဲ့ယူရို-၂၀၂၄ ပွဲစဉ်တွေမှာ ပါဝင်မယ်ဆိုရင် မျက်နှာဖုံးတပ်ဆင်ပြီး ကစားရမှာပါ။
အခုအချိန်မှာတော့ ပြင်သစ်အသင်းနည်းပြ ဒေးရွှမ့်စ်က ဘာပေဟာ ယူရို-၂၀၂၄ ပြိုင်ပွဲအပြီးမှာ နှာခေါင်းခွဲစိတ်မှုခံယူရမယ်လို့ ပြောခဲ့တာဖြစ်ပါတယ်။
ဒေးရွှမ့်စ်က “ဒီနေ့မှာ သူ့ရဲ့ ဆင့်ကဲဖြစ်စဉ်ကို သိနိုင်ဖို့အတွက် နောက်ထပ်စမ်းသပ်မှုတွေပြုလုပ်ဖို့ရှိနေပါတယ်။ ဘာပေအနေနဲ့ ခွဲစိတ်မှုကို အခုချက်ချင်းမလုပ်ရင်တောင် ပြိုင်ပွဲအပြီးမှာ ပြုလုပ်ရပါလိမ့်မယ်။ ဒီမနက်ပိုင်းမှာတော့ သူအနည်းငယ်ကောင်းမွန်နေပြီ”လို့ ဆိုခဲ့တာပါ။
ပြင်သစ်မီဒီယာတွေကတော့ ဘာပေဟာ နယ်သာလန်အသင်းနဲ့ ကစားမယ့် ပြင်သစ်အသင်းရဲ့အုပ်စုဒုတိယပွဲစဉ်ကို ပါဝင်ဖို့ မသေချာဘူးလို့ ဖော်ပြထားသလို အနည်းဆုံး(၁၅)ရက်အနားယူရမှာဖြစ်လို့ ပြင်သစ်အသင်းကွာတားဖိုင်နယ်ရောက်ရှိမှသာ ပြန်လည်ပါဝင်နိုင်မယ်လို့လည်း ဖော်ပြထားပါတယ်။