ဆောက်ဂိတ်နဲ့ ကိုးလ်ပါမားတို့ကြား အဆင်မပြေဖြစ်ခဲ့တဲ့ အခိုက်အတန့်ကို ပရိသတ်တွေမြင်တွေ့ခဲ့ရ
မနေ့က ဒိန်းမတ်(၁-၁)အင်္ဂလန် ယူရို-၂၀၂၄ အုပ်စုဒုတိယပွဲစဉ်အပြီးမှာ အင်္ဂလန်အသင်းနည်းပြ ဆောက်ဂိတ်နဲ့ လူငယ်ကြယ်ပွင့် ကိုးလ်ပါမားတို့ကြားမှာ အဆင်မပြေတဲ့အခိုက်အတန့်ကို ပရိသတ်တွေ မြင်တွေ့ခဲ့ကြပါတယ်။
ကိုးလ်ပါမားဟာ ပြီးခဲ့တဲ့ရာသီက ချယ်လ်ဆီးအသင်းမှာ ခြေစွမ်းပြသနိုင်ခဲ့တာကြောင့် ယူရို-၂၀၂၄ ပြိုင်ပွဲဝင်အင်္ဂလန်အသင်းရဲ့အပြီးသတ်လူစာရင်းမှာ ရွေးချယ်ခံခဲ့ရတာပါ။
ဒါပေမယ့် ကိုးလ်ပါမားဟာ အင်္ဂလန်အသင်းရဲ့ယူရို-၂၀၂၄ အုပ်စုပွဲစဉ်(၂)ပွဲစလုံး လူစားဝင်ကစားသမားအဖြစ်တောင် ပါဝင်ကစားခွင့် မရရှိသေးတာဖြစ်ပါတယ်။ ဒိန်းမတ်အသင်းနဲ့ ပွဲစဉ်မှာ အင်္ဂလန်အသင်းရဲ့တိုက်စစ်ပိုင်းဟာ အားရစရာမကောင်းခဲ့တာကြောင့် နည်းပြ ဆောက်ဂိတ်ဟာ တိုက်စစ်ပိုင်းကို လူစားလဲမှုတွေ ပြုလုပ်ခဲ့ရာမှာ ကိုးလ်ပါမားကို အသုံးပြုခဲ့ခြင်းမရှိပဲ ဘိုဝင်၊ ဝက်ကင်စ်နဲ့ အီဇီတို့ကို ထည့်သွင်းသွားခဲ့တာပါ။
cole barely looking #him in the eye so true pic.twitter.com/0WB7ocsPWZ
— tills x5🏆 (@cwfcbrighty) June 20, 2024
ပွဲအပြီးမှာ ကိုးလ်ပါမားကို နည်းပြဆောက်ဂိတ်က လက်ဆွဲနှုတ်ဆက်မှုပြုလုပ်ခဲ့ရာမှာ ကိုးလ်ပါမားဟာ နည်းပြရဲ့မျက်နှာကို ကြည့်ခဲ့ခြင်းမရှိတာကို ရုပ်သံတွေက အမိအရမှတ်တမ်းတင်နိုင်ခဲ့တာဖြစ်ပါတယ်။ ကိုးလ်ပါမားဟာ နည်းပြဆောက်ဂိတ်ကို အလွန်စိတ်ပျက်နေကြတယ်လို့ ပရိသတ်တွေက ထင်မြင်ခဲ့ကြပြီး သူတို့ရဲ့မှတ်ချက်တွေကို ဆိုရှယ်မီဒီယာမှာ ရေးသားဖော်ပြခဲ့ကြပါတယ်။
အင်္ဂလန်အသင်းဟာ ယူရို-၂၀၂၄ အုပ်စုနောက်ဆုံးပွဲစဉ်အဖြစ် ဆလိုဗေးနီးယားအသင်းနဲ့ ယှဉ်ပြိုင်ရမှာဖြစ်ပြီး နည်းပြဆောက်ဂိတ်အနေနဲ့ ကိုးလ်ပါမားကို အသုံးပြုမလားဆိုတာ စောင့်ကြည့်ရမှာဖြစ်ပါတယ်။
