ဘိုင်ယန်မြူးနစ်က မိမိကို နည်းပြအဖြစ် ပြန်လည်ခန့်အပ်ဖို့ ကြိုးပမ်းခဲ့တယ်လို့ ဗန်ဟားလ်ဆို
မန်ယူနိုက်တက်နဲ့ ဘာစီလိုနာအသင်းနည်းပြဟောင်း ဗန်ဟားလ်က ဘိုင်ယန်မြူးနစ်အသင်းဟာ နွေရာသီက သူ့ကို နည်းပြအဖြစ်ပြန်လည်ခန့်အပ်ဖို့ ကြိုးပမ်းခဲ့တယ်လို့ ဆိုခဲ့ပါတယ်။
ဘိုင်ယန်မြူးနစ်အသင်းဟာ ဂျာမန်လူမျိုးနည်းပြ တူချယ်လ်နည်းပြရာထူးက ထွက်ခွာပြီးနောက် နည်းပြသစ်ရှာဖွေမှုတွေပြုလုပ်ခဲ့ပြီး နောက်ဆုံးမှာ ဘန်လေအသင်းနည်းပြဟောင်း ကွန်ပနီကို နည်းပြသစ်အဖြစ်ခန့်အပ်ခဲ့တာပါ။
ဗန်ဟားလ်ဟာ ဘိုင်ယန်မြူးနစ်အသင်းကို ၂၀၀၉ ကနေ ၂၀၁၁ အထိကိုင်တွယ်ခဲ့ပြီး ဘွန်ဒစ်လီဂါဖလားအပါအဝင် ဆုဖလား(၃)ခုရယူပေးနိုင်ခဲ့ပြီး ၂၀၀၉-၁၀ ရာသီက ချန်ပီယံလိဂ်ဗိုလ်လုပွဲရောက်ရှိအောင် ပို့ဆောင်ပေးနိုင်ခဲ့တာဖြစ်ပါတယ်။ ဗန်ဟားလ်ဟာ ၂၀၂၂ က နယ်သာလန်အသင်းနည်းပြရာထူးက ထွက်ခွာပြီးနောက် လက်ရှိအချိန်မှာ အိုင်းယက်စ်အသင်းရဲ့အကြံပေးအဖြစ် ဆောင်ရွက်နေတာပါ။
ဗန်ဟားလ်ဟာ နိုင်ငံအသင်းကိုသာ ကိုင်တွယ်ဖို့ စိတ်ဝင်စားတာကြောင့် ဘိုင်ယန်မြူးနစ်အသင်းရဲ့ကမ်းလှမ်းမှုကို ချက်ချင်းပယ်ချခဲ့တယ်လို့ RTL နဲ့ အင်တာဗျူးမှာ ဆိုခဲ့ပါတယ်။ ဗန်ဟားလ်က “နိုင်ငံအသင်းနည်းပြအနေနဲ့ နည်းပြအဖွဲ့ဝင်တွေ၊ကင်းထောက်တွေနဲ့ အချိန်အများစုကိုအလုပ်ရှုပ်နေတာပါ။ ဒါကဖြစ်နိုင်သေးတယ်”လို့ ဆိုခဲ့တာပါ။
ဘိုင်ယန်မြူးနစ်အသင်းဟာ လက်ရှိအချိန်မှာ ရာသီသစ်အတွက် ပြင်ဆင်မှုတွေပြုလုပ်နေပြီး စပါးအသင်းနဲ့ ကစားခဲ့တဲ့ ခြေစမ်းပွဲမှာ (၂-၁)ဂိုးနဲ့ အနိုင်ရခဲ့ပြီး သြဂုတ်(၁၀)ရက်မှာ စပါးအသင်းနဲ့ပဲ လန်ဒန်မှာ ခြေစမ်းပွဲယှဉ်ပြိုင်သွားမှာ ဖြစ်ပါတယ်။
