ပရီးမီးယားလိဂ် ရာသီသစ်အတွက် မန်ယူနိုက်တက် အဆင်သင့်မဖြစ်သေးဘူးလို့ တန်ဟတ် ဆို
ဒီနေ့ကစားမယ့် မန်ယူနိုက်တက်-ဖူလ်ဟမ် ပရီးမီးယားလိဂ်အဖွင့်ပွဲစဉ်မတိုင်ခင်မှာ မန်ယူနိုက်တက်အသင်းဟာ ရာသီသစ်အတွက် အဆင်သင့်မဖြစ်သေးဘူးလို့ နည်းပြ အဲရစ်တန်ဟတ်က ပွဲကြိုမီဒီယာတွေ့ဆုံမှုမှာ ဆိုခဲ့ပါတယ်။ မန်ယူနိုက်တက်အသင်းကစားသမားတွေအားလုံးဟာ အသင်းလိုက်စုပေါင်းပြီးလေ့ကျင့်မှုပြုလုပ်တဲ့အချိန်နည်းပါးမှုအပေါ် နည်းပြ အဲရစ်တန်ဟတ်က စိုးရိမ်မှုတွေရှိနေတာပါ။
မန်ယူနိုက်တက်အသင်းရဲ့အဓိက ကစားသမားအများစုဟာ ယူရို-၂၀၂၄ ပြိုင်ပွဲနဲ့ ကိုပါအမေရိကဖလားပြိုင်ပွဲယှဉ်ပြိုင်ခဲ့ကြလို့ ကလပ်အသင်းရဲ့ရာသီကြိုခြေစမ်းပွဲတွေကို လွဲချော်ခဲ့တာဖြစ်ပါတယ်။ အဲ့ဒါကြောင့် အသင်းလိုက်လေ့ကျင့်မှုပြုလုပ်တဲ့အချိန်နည်းပါးနေပေမယ့် ပရီးမီးယားလိဂ်ရာသီသစ်က ရောက်ရှိလာခဲ့တာပါ။ ဒီအတွက် မန်ယူနိုက်တက်အသင်းဟာ ပရီးမီးယားလိဂ်ရာသီသစ်အတွက် အဆင်သင့်မဖြစ်သေးဘူးလို့ နည်းပြအဲရစ်တန်ဟတ်က ပြောလာခဲ့တာဖြစ်ပါတယ်။
အဲရစ်တန်ဟတ်က “အသင်းက အဆင်သင့်မဖြစ်သေးပေမယ့် လိဂ်ပြိုင်ပွဲကစတင်ပါပြီ။ ဒါကို ကျွန်တော်တို့ ဖုံးကွယ်ထားမှာမဟုတ်ဘဲ ကိုင်တွယ်ဖြေရှင်းသွားမှာပါ”လို့ ဆိုခဲ့တာပါ။
ဒါ့အပြင် နည်းပြအဲရစ်တန်ဟတ်က ခံစစ်ပိုင်းဒဏ်ရာတွေကြောင့် ပြီးခဲ့တဲ့ရက်ပိုင်းက ဘိုင်ယန်မြူးနစ်ကနေခေါ်ယူထားခဲ့တဲ့ ဒီလစ်နဲ့ မက်ဇ်ရာအူရီတို့ဟာ ဖူလ်ဟမ်အသင်းနဲ့ပွဲအတွက် မန်ယူနိုက်တက်အသင်းရဲ့လူစာရင်းမှာ ပါဝင်မယ်လို့လည်း အတည်ပြုထားပါတယ်။ မန်ယူနိုက်တက်အသင်းရဲ့ဘယ်နောက်ခံလူတွေဖြစ်တဲ့ လုပ်ခ်ရှောနဲ့ မာလာစီယာတို့ဟာ ဖူလ်ဟမ်အသင်းနဲ့ပွဲကို မပါဝင်နိုင်လို့ မက်ဇ်ရာအူရီဟာ ဘယ်နောက်ခံလူအဖြစ် ဖူလ်ဟမ်အသင်းနဲ့ပွဲမှာ ပွဲထွက်လာနိုင်တာဖြစ်ပါတယ်။
