၂၀၀၉ ခုနှစ်က စီရော်နယ်ဒို မိတ်ဆက်ပွဲကိုပြန်သတိရစေတဲ့ ဘာပေရဲ့ ရီးရဲလ်မက်ဒရစ်မိတ်ဆက်ပွဲ
ရီးရဲလ်မက်ဒရစ်အသင်းကို ရောက်ရှိလာတဲ့ ပြင်သစ်တိုက်စစ်မှူးဘာပေရဲ့မိတ်ဆက်ပွဲကို ဘာနေဗျူးကွင်းမှာ ကျင်းပခဲ့ရာမှာ ပရိသတ်(၈၀၀၀၀)ကျော် ကွင်းအတွင်းလာရောက်အားပေးခဲ့ကြပါတယ်။
ဘာပေရဲ့မိတ်ဆက်ပွဲက လွန်ခဲ့တဲ့ (၁၅)နှစ်က ကမ္ဘာ့အကောင်းဆုံးဘောလုံးသမားဆုရ ပေါ်တူဂီတောင်ပံကစားသမားစီရော်နယ်ဒိုရဲ့ မိတ်ဆက်ပွဲအခမ်းအနားကို ပြန်အမှတ်ရစေပါတယ်။
ရီးရဲလ်မက်ဒရစ်အသင်းသမိုင်းတစ်လျှောက်မှာ သူတို့နှစ်ဦးရဲ့မိတ်ဆက်ပွဲအခမ်းအနားက ပရိသတ်အများဆုံးတက်ရောက်တဲ့မိတ်ဆက်ပွဲတွေအဖြစ် မှတ်တမ်းတင်ခဲ့ပါတယ်။
မိတ်ဆက်ပွဲမပြုလုပ်မီ ဘာနေဗျူးကွင်းအတွင်းမှာ ဘာပေကို ဆေးစစ်ခဲ့ပြီး ရီးရဲလ်ကစားသမားဘ၀ ပထမဆုံးမီဒီယာတွေ့ဆုံပွဲကိုလည်း ပြုလုပ်ခဲ့ပါတယ်။ ဘာပေက သူ့ဘဝတစ်လျှောက်လုံးမျှော်မှန်းထားတဲ့အရာတွေ ဖြစ်လာခဲ့ပြီဖြစ်ကြောင်း၊ သူ့ရဲ့အိပ်မက်တွေ အမှန်တကယ်ဖြစ်လာခဲ့ခြင်းအတွက် ရီးရဲလ်မက်ဒရစ်အသင်းကို ကျေးဇူးတင်ကြောင်း ပြောသွားခဲ့ပါတယ်။
ဘာပေ မိတ်ဆက်ပွဲကျင်းပတဲ့ ဘာနေဗျူးကွင်းအတွင်းက စင်မြင့်ထက်မှာ ရီးရဲလ်မက်ဒရစ်အသင်းရရှိခဲ့တဲ့ ချန်ပီယံလိဂ်ဖလား(၁၅)လုံးကို တင်ထားခဲ့ပြီး ဒီဖလားတွေအနားမှာ ကြီးမားတဲ့ Screen ကြီးတစ်ခုထားရှိပါတယ်။
စင်မြင့်ထက်ကို ရောက်ရှိလာပြီးနောက် ဘာပေက ပရိသတ်တွေနဲ့အတူ “Uno(1)..Dos(2)..Tres(3)..HALA MADRID !” လို့ ကြွေးကြော်ခဲ့ပါတယ်။
ဒီလိုလုပ်တာက ၂၀၀၉ ခုနှစ်က စီရော်နယ်ဒိုလုပ်ခဲ့သလို လိုက်လုပ်ခဲ့တာဖြစ်ပါတယ်။ ဒါပေမယ့် ဘာပေက သူ့ရဲ့စံပြကစားသမားနဲ့ ပတ်သက်ပြီး စီရော်နယ်ဒိုလို ကစားသမားမျိုးက တုပလို့မရနိုင်ကြောင်းနဲ့ နောက်ထပ်ပေါ်ထွက်လာဖို့ မရှိကြောင်း ပြောခဲ့ပါတယ်။ ဒီအသင်းကို သူပြောင်းရွှေ့ခဲ့ရာမှာ စီရော်နယ်ဒိုထံက အကြံဉာဏ်ကောင်းများစွာနဲ့ အကူအညီတွေရခဲ့ကြောင်းလည်း ဘာပေက ဆိုခဲ့ပါတယ်။