လက်ရှိမှာ ကစားသမား (၄၂) ယောက်အထိရှိနေတဲ့ ချယ်လ်ဆီးအသင်း ကစားသမားတစ်ဦး ထပ်မံစာချုပ်

ပရီးမီးယားလိဂ်ရဲ့ ဒီနွေရာသီ ပြောစရာအကြောင်းအရာတွေထဲမှာ တစ်ခုအဖြစ်ပါဝင်နေတာက ချယ်လ်ဆီးအသင်းရဲ့ကစားသမားအရေအတွက် ဖောင်းပွမှုပါပဲ။

ချယ်လ်ဆီးအသင်းမှာ လက်ရှိကစားသမားအင်အားက (၄၂)ဦးအထိရှိနေပြီး ပရီးမီးယားလိဂ်က ဘယ်ကလပ်အသင်းထက်မဆို များပြားနေတဲ့ အရေအတွက်ပါ။

ဒီလို ကစားသမားတွေ များပြားနေပေမယ့် ချယ်လ်ဆီးအသင်းရဲ့ဒီနွေရာသီ ကစားသမားသစ်ခေါ်ယူမှုက မပြီးသေးပါဘူး။

ချယ်လ်ဆီးအသင်းဟာ အာဂျင်တီးနားကလပ် ဘိုကာဂျူနီယာအသင်းက လူငယ်ကစားသမား အာရွန်အန်ဆယ်လ်မီနိုကို ထပ်မံခေါ်ယူလိုက်ကြောင်းသိရပါတယ်။

အသက်(၁၉)နှစ်အရွယ် အန်ဆယ်လ်မီနိုအတွက် ချယ်လ်ဆီးအသင်းအနေနဲ့ ပြောင်းရွှေ့ကြေးပေါင်(၁၅.၆)သန်းခန့်ကုန်ကျခဲ့ကြောင်းသိရပါတယ်။ ဒါပေမယ့် ဒီကစားသမားကိုတော့ ချယ်လ်ဆီးအသင်းက အသင်းကို ချက်ချင်းခေါ်ယူဦးမှာမဟုတ်ဘဲ ဘိုကာဂျူနီယာအသင်းကို တစ်ရာသီအငှားပြန်ချထားမှာဖြစ်ကြောင်း သိရပါတယ်။

ချယ်လ်ဆီးအသင်းဟာ ဒီနွေရာသီမှာ ကစားသမားခေါ်ယူမှု(၈)ဦးအထိရှိလာပြီး ပြောင်းရွှေ့ကြေးသုံးစွဲမှုစုစုပေါင်း(၁၁၀.၆)သန်းအထိ ရှိလာခဲ့ပြီဖြစ်ပါတယ်။

ချယ်လ်ဆီးအသင်းပိုင်ရှင်သစ်တွေဖြစ်တဲ့ တော့ဒ်ဘိုလေးနဲ့ အပေါင်းပါတွေဟာ အသင်းမှာ ဆယ်ကျော်သက်(အသက် ၂၀ နှစ်အောက်)ကစားသမားတွေကို အများအပြားခေါ်ယူရင်းနှီးမြှုပ်နှံနေပြီး အသင်းပိုင်ရှင်သစ်တွေလက်ထက်မှာ (အန်ဆယ်လ်မီနိုရဲ့ကြေးအပါအဝင်)ဆယ်ကျော်သက်ကစားသမားတွေအတွက် သုံးစွဲမှုစုစုပေါင်းက ပေါင်(၃၁၉.၁)သန်းအထိရှိနေပါတယ်။