ယူရိုပြိုင်ပွဲမှာ ဂိုးသွင်းအများဆုံးသာမက ဂိုးဖန်တီးမှုအများဆုံး ကစားသမားအဖြစ်ပါ ရပ်တည်နိုင်ခဲ့တဲ့ စီရော်နယ်ဒို
ယူရိုပြိုင်ပွဲသမိုင်းမှာ ဂိုးအများဆုံးသွင်းသူအဖြစ် စံချိန်တင်ထားတဲ့ ပေါ်တူဂီတိုက်စစ်မှူးစီရော်နယ်ဒိုက ဂိုးဖန်တီးမှုအများဆုံးကစားသမားစာရင်းမှာလည်း ထိပ်ဆုံးကို ရောက်လာပါတယ်။
စီရော်နယ်ဒိုဟာ ယူရိုပြိုင်ပွဲကို အကြိမ်အများဆုံးအဖြစ် (၆)ကြိမ်တိုင်ပါဝင်ကစားခဲ့ပြီး သွင်းဂိုး(၁၄)ဂိုးသွင်းကာ ဂိုးသွင်းအများဆုံးကစားသမားအဖြစ် စံချိန်တင်ထားတာပါ။ အခု ဂိုးဖန်တီးမှုအများဆုံးကစားသမားစာရင်းမှာလည်း ချက်ကွင်းလယ်လူဟောင်း ပိုဘော့စကီးရဲ့စံချိန်ကို လိုက်မီခဲ့ပြီး ထိပ်ဆုံးမှာ ပူးတွဲရပ်တည်နိုင်ခဲ့ပါတယ်။
ပိုဘော့စကီးက ယူရိုပြိုင်ပွဲမှာ ဂိုးဖန်တီးမှုအများဆုံးကစားသမားအဖြစ် (၈)ကြိမ်နဲ့ ဦးဆောင်နေတာကို စီရော်နယ်ဒိုက တူရကီ(ဝ-၃)ပေါ်တူဂီပွဲမှာ (၁)ဂိုးဖန်တီးပေးခဲ့ပြီး စံချိန်တူလိုက်မီခဲ့တာပါ။ ဒီပွဲမှာပေါ်တူဂီအသင်းအတွက် တတိယဂိုးကို ဘရူနိုဖာနန်ဒက်စ်သွင်းယူနိုင်အောင် ရော်နယ်လ်ဒိုက ဖန်တီးပေးခဲ့တာဖြစ်ပါတယ်။
ဒါကြောင့် ယူရိုပြိုင်ပွဲမှာ စီရော်နယ်ဒိုအနေနဲ့ ဂိုးသွင်းအများဆုံး၊ ဂိုးဖန်တီးမှုအများဆုံးဖြစ်နေတာကြောင့် ဂိုးပါဝင်ပတ်သက်မှုအများဆုံးကစားသမားစာရင်းမှာလည်း (၂၂)ဂိုးနဲ့ ထိပ်ဆုံးမှာ ရပ်တည်နိုင်ခဲ့ပါတယ်။
လက်ရှိယူရိုပြိုင်ပွဲမှာ စီရော်နယ်ဒိုအနေနဲ့ (၂)ပွဲကစားပြီးချိန်မှာ ဂိုးမသွင်းနိုင်သေးဘဲ ဂိုးဖန်တီးမှုသာ ပြုလုပ်ထားနိုင်တာပါ။ တကယ်လို့ ဂိုးသွင်းနိုင်ခဲ့ရင် အဓိကနိုင်ငံတကာပြိုင်ပွဲကြီး (၁၀)ကြိမ်အထက် (ကမ္ဘာ့ဖလား ၅ ကြိမ်၊ ယူရို ၆ ကြိမ်)ဂိုးသွင်းနိုင်တဲ့ ပထမဆုံးကစားသမားအဖြစ်လည်း စံချိန်တင်နိုင်မှာဖြစ်ပါတယ်။
