အာဂျင်တီးနားထိပ်ဆုံးမှာ ဆက်ရှိနေပြီး ယူရိုချန်ပီယံ အဆင့်(၅)ဆင့်တက်လာတဲ့ ဖီဖာကမ္ဘာ့အဆင့်
ကမ္ဘာ့ဘောလုံးအဖွဲ့ချုပ်(ဖီဖာ)က နိုင်ငံလက်ရွေးစင်အသင်းတွေရဲ့ကမ္ဘာ့အဆင့်သတ်မှတ်ချက်ကို ထုတ်ပြန်ခဲ့ရာမှာ ယူရို-၂၀၂၄ ချန်ပီယံစပိန်အသင်းက အဆင့်(၅)ဆင့်အထိ မြင့်တက်လာခဲ့ပါတယ်။
လက်ရှိကမ္ဘာ့ဖလားချန်ပီယံနဲ့ ကိုပါအမေရိကချန်ပီယံ အာဂျင်တီးနားအသင်းက အရင်အတိုင်း ထိပ်ဆုံးနံပါတ်(၁)နေရာမှာ ဆက်လက်ဦးဆောင်ခဲ့ပြီး (၂)နှစ်(၃)လကြာ ထိပ်ဆုံးနေရာကို ဆုပ်ကိုင်နိုင်ခဲ့တာလည်း ဖြစ်ပါတယ်။
အာဂျင်တီးနားအသင်းအနေနဲ့ ၂၀၂၃ ခုနှစ်ဧပြီလကတည်းက ကမ္ဘာ့အဆင့်(၁)နေရာကို သိမ်းပိုက်ထားခဲ့တာဖြစ်ပြီး လက်ရှိအသင်းရဲ့အောင်မြင်မှုတွေအရ ရမှတ်တွေများစွာရရှိနေတာကြောင့် ဒီနေရာမှာ ဆက်လက်တည်မြဲနေဦးမှာ ဖြစ်ပါတယ်။
ယူရို-၂၀၂၄ ပြိုင်ပွဲမှာ ဆီမီးဖိုင်နယ်အထိ တက်ရောက်ခဲ့တဲ့ ပြင်သစ်အသင်းကလည်း အာဂျင်တီးနားလိုပဲ အဆင့်(၂)နေရာကို ဆက်ပြီးထိန်းသိမ်းနိုင်ခဲ့ပါတယ်။
အရင်ထုတ်ပြန်မှုမှာ အဆင့်(၈)နေရာမှာ ရှိခဲ့တဲ့ စပိန်အသင်းက အဆင့်(၅)ဆင့်တိုးကာ အဆင့်(၃)နေရာကို ရောက်လာပြီး အရင်အဆင့်(၃)မှာ ရှိခဲ့တဲ့ ဘယ်လ်ဂျီယံအသင်းက အဆင့်(၃)ဆင့်ကျကာ အဆင့်(၆)ကို ရောက်သွားခဲ့ပါတယ်။ ယူရို-၂၀၂၄ ပြိုင်ပွဲမှာ ဗိုလ်လုပွဲကို ရောက်ခဲ့တဲ့ အင်္ဂလန်အသင်းက အဆင့်(၁)ဆင့်မြင့်တက်ခဲ့ပြီး အဆင့်(၄)ကို ရောက်လာခဲ့ပါတယ်။
ကိုပါအမေရိကပြိုင်ပွဲမှာ ဗိုလ်လုပွဲကို ရောက်ခဲ့တဲ့ ကိုလံဘီယာအသင်းကလည်း အဆင့်(၃)ဆင့်တက်ကာ အဆင့်(၉)ကို ရောက်လာခဲ့ပါတယ်။ ထိပ်ဆုံး(၁၀)သင်းစာရင်းမှာတော့ ဘရာဇီးလ်၊ ဘယ်လ်ဂျီယံနဲ့ ပေါ်တူဂီတို့ အဆင့်ကျခဲ့ပြီး အာဂျင်တီးနား၊ ပြင်သစ်၊ နယ်သာလန်နဲ့ အီတလီတို့ကတော့ အရင်အဆင့်အတိုင်းရပ်တည်နိုင်ခဲ့ပါတယ်။
မြန်မာလက်ရွေးစင်အသင်းက အရင်ထုတ်ပြန်မှုထက် အဆင့်(၂)ဆင့်လျော့ကျကာ အဆင့်(၁၆၆)ကို ရောက်သွားခဲ့ပါတယ်။