ပါကယ်တာ ဘက်ကရပ်တည်ပြီး FA ကို အားကစားခုံရုံးမှာ ရင်ဆိုင်တုံ့ပြန်သွားမယ့် ဝက်စ်ဟမ်းအသင်း
ဝက်စ်ဟမ်းအသင်းဟာ သူတို့ရဲ့ကွင်းလယ်လူပါကယ်တာကို အရေးယူဖို့ စီစဉ်နေတဲ့ အင်္ဂလန်ဘောလုံးအဖွဲ့ချုပ်(FA)ကို အားကစားဥပဒေလမ်းကြောင်းအရ ပြန်လည်တုံ့ပြန် ရင်ဆိုင်သွားဖို့ စဉ်းစားနေကြောင်း သိရပါတယ်။
ဆွစ်ဇာလန်နိုင်ငံ၊ လူဆန်နီမြို့မှာရှိတဲ့ နိုင်ငံတကာအားကစားခုံရုံး(Court of Arbitration for Sport)ကနေ FA ကို ရင်ဆိုင်တုံ့ပြန်သွားဖို့ ဝက်စ်ဟမ်းအသင်းတာဝန်ရှိသူတွေက ဥပဒေရေးရာကျွမ်းကျင်သူတွေနဲ့ တိုင်ပင်နေတာပါ။
ဘရာဇီးလ်လက်ရွေးစင်းလယ်လူ ပါကယ်တာဟာ ဝက်စ်ဟမ်းအသင်းအတွက် ပါဝင်ကစားခဲ့တဲ့ ပွဲစဉ်(၄)ပွဲမှာ အဝါကတ်တမင်တကာရယူခဲ့တယ်လို့ FA က စွပ်စွဲထားတာပါ။
ပါကယ်တာဟာ သူကိုယ်တိုင်ဖြစ်စေ၊ သူ့ရဲ့မိတ်ဆွေသူငယ်ချင်း၊ ဆွေမျိုးတွေဖြစ်စေ လောင်းကစားခြင်းကနေ လောင်းကြေးငွေ အမြတ်အစွန်းရရှိဖို့ အဝါကတ်တမင်အပြခံခဲ့တယ်လို့ စွပ်စွဲခံနေရတာပါ။
ဘရာဇီးလ်နိုင်ငံက ဘွတ်ကီဒိုင်တွေမှာ ဒီပွဲ(၄)မှာ ပါကယ်တာအဝါကတ်ထိမယ်ဆိုတဲ့ဘက်က လောင်းကြေးအများအပြားတင်သူတွေရှိနေပြီး လျော်ကြေးငွေအများအပြားပေးလျော်ရပြီးနောက် ဒီလို စွပ်စွဲမှုတွေ ရှိလာခဲ့တာပါ။
FA က သူ့ကို Spot-Fixing ပြစ်ချက်နဲ့ အရေးယူဖို့ စီစဉ်နေပြီး တကယ်လို့ ပါကယ်တာအနေနဲ့ စွဲချက်တွေအတိုင်း အပြစ်ရှိကြောင်း ထင်ရှားရင် ပွဲပယ်ပြစ်ဒဏ် အနည်းဆုံး(၆)လကနေ ရာသက်ပန်ပွဲပယ်ပြစ်ဒဏ်အထိ ကျခံရနိုင်ပါတယ်။
ဒီစွပ်စွဲချက်တွေက အဓိပ္ပာယ်မရှိဘူးလို့ ဝက်စ်ဟမ်းအသင်းတာဝန်ရှိသူတွေက ပြောဆိုခဲ့ကြသလို ပါကယ်တာကိုယ်တိုင်ကလည်း ဒီစွပ်စွဲချက်တွေအားလုံးကို ငြင်းဆိုထားပါတယ်။
