ပရော်ဖက်ရှင်လက်ဝှေ့သမားဘဝကို ပထမဆုံးဆင်နွှဲတော့မယ့် ဒန်နီဆင်ပ်ဆင်
ဘောလုံးလောကမှာ ဘောလုံးသမားဘဝကနေ အခြားမိမိဝါသနာပါရာ အားကစားတွေကို ပြောင်းလဲကစားခဲ့ကြတဲ့ ဘောလုံးသမားတွေများစွာရှိပါတယ်။
ချက်ဂိုးသမားပီတာချက်ဆိုရင် ဘောလုံးသမားဘဝက အနားယူတာနဲ့ ရေခဲပြင်ဟော်ကီကစားတယ်။ အာဂျင်တီးနားတိုက်စစ်မှူးဘာတစ္စတူတာက ပိုလိုကစားတယ်။ အီတလီနောက်ခံလူမာလ်ဒီနီက တင်းနစ်ကစားတယ်။ ဝေးလ်တောင်ပံကစားသမားဂါရတ်ဘေးလ်က ဂေါက်သီးကစားတယ်။ ဒီလို အားကစားနည်း ပြောင်းရွှေ့ကစားကြတဲ့ ကစားသမားတွေက မနည်းမနောပါပဲ။
လက်စတာအသင်းနဲ့အတူ ပရီးမီးယားလိဂ်ချန်ပီယံဆုကို ဆွတ်ခူးခဲ့ဖူးတဲ့ နောက်ခံလူဟောင်း ဒန်နီဆင်ပ်ဆင်ကတော့ လက်ဝှေ့ကို ကူးပြောင်းခဲ့ပါတယ်။
ဒန်နီဆင်ပ်ဆင်ဟာ သူ့ရဲ့ ပရော်ဖက်ရှင်နယ်လက်ဝှေ့သမားဘ၀ ပထမဆုံးပွဲဦးထွက်ပွဲအဖြစ် အခုလာမယ့် သြဂုတ်(၃၁)ရက်နေ့မှာ အင်္ဂလိပ်လူမျိုး YouTuber တစ်ဦးဖြစ်သူ ဒန်နီအာရွန်စ်နဲ့ ထိုးသတ်သွားမှာဖြစ်ပါတယ်။
ပြီးခဲ့တဲ့ ဇူလိုင်(၂၄)ရက်နေ့ကမှ ဒန်နီဆင်ပ်ဆင်ဟာ ဘောလုံးသမားဘဝက အနားယူကြောင်း ကြေညာခဲ့တာပါ။ အိုင်ယာလန်နိုင်ငံ၊ ဒက်ဘလင်မြို့မှာကျင်းပမယ့် Misfits Boxing ပွဲမှာ MF & DAZN : X Serie 17 ပွဲဆိုင်းအဖြစ် ဒန်နီဆင်ပ်ဆင်နဲ့ ဒန်နီအာရွန်စ်တို့ ထိုးသတ်မှာဖြစ်ပါတယ်။
ဒီပွဲက ဒန်နီနှစ်ဦးစလုံးအတွက် ပရော်ဖက်ရှင်နယ်လက်ဝှေ့သမားဘ၀ ပထမဆုံးပွဲဦးထွက်ပွဲလည်း ဖြစ်ပါတယ်။ မန်ယူနိုက်တက်လူငယ်အကယ်ဒမီက ထွက်ပေါ်လာခဲ့တဲ့ ဒန်နီဆင်ပ်ဆင်ဟာ အသင်းပေါင်းများစွာကို အငှားချခံရပြီးနောက် (၂၀၁၀) မှာ နယူးကာဆယ်ကို အပြီးသတ်ပြောင်းရွှေ့ခဲ့ပါတယ်။ အဲဒီနောက် (၂၀၁၃) မှာ ကျူပီအာ၊ (၂၀၁၄) မှာ လက်စတာအသင်းတို့ကို ပြောင်းရွှေ့ပြီး (၂၀၁၅-၁၆) ရာသီမှာ လက်စတာအသင်းနဲ့အတူ ပရီးမီးယားလိဂ်ဖလားကို ဆွတ်ခူးနိုင်ခဲ့ပါတယ်။
ပရော်ဖက်ရှင်နယ်ဘောလုံးသမားဘဝကနေ လက်ဝှေ့သမားတစ်ဦးဘဝကို ပြောင်းလဲခဲ့တဲ့ ဒန်နီဆင်ပ်ဆင်အနေနဲ့ ပထမဆုံးပွဲဦးထွက်ပွဲမှာ ဘယ်လိုတာထွက်မလဲဆိုတာတော့ စောင့်ကြည့်ရမှာပါပဲ။
